اكتوبر العظيم بقلم الشاعره /جومانة أحمد _ملتقى الأدباء العرب
يوم سته في شهر اكتوبر
والعام دا تلاته وسبعين
حققنا النصر بعزه
وماعدش ” يونيو “حزين
التار خدناه بإيدينا
بشجاعة ونصر مبين
بإرادة الشعب الصامد
ورجال جيشنا الصاحيين
***
” بارليف ” الساتر العالي
بيزيد إحساس القهر
وقناتي قصادي بتغلي
صهيون ساكن ع البر
وجنوده بتلعب كوره
والبعض يعوم في البحر
أوغاد بتعاند فينا
م الصبح لبعد العصر
***
وكتير بينادوا علينا
سنة سوده يا مصرين
جايين في المرة التانية
على شبرا ورأس التين
والدم بيغلي في راسي
وسلاحي ف إيدي حزين
والقلب بحرقه بيشكي
والنبض ف صدري أنين
***
يوم سته في شهر اكتوبر
الساعة اتنين الضهر
من غرب لشرق لقينا
أسراب طيران بتمر
والعلم المصري عليها
و “الميج” بيصد الغدر
مدافعنا تدك الساتر
بارليف”،أخدود”العصر
***
وقوارب شايله جنودنا
بتعدَّي لهدّ بناه
ومدافع ميه بتهدم
والقدرة إراده الله
وف ست ساعات مش غيرهم
الخط الساحر تاه
وجنود صهيون مدبوحة
وعلمنا فوق محلاه
للنصر حلاوة ومتعه
نترحَّم ع الشهداء
نقرى في دعانا الفاتحه
مهما تكون الأسماء
جرجس أو فادي وعبده
الكل في جيشنا سواء
مصر المحروسة بلدنا
وشبابنا بروحه فداء
تعليقات
إرسال تعليق